Në kuadër të shënimit të 14 Nëntorit, Ditës Botërore të Diabetit, është organizuar një aktivitet sensibilizues në sheshin e qytetit në Podujevë, gjatë të cilit qytetarëve u është ofruar matja falas e sheqerit në gjak.
Ky aktivitet është organizuar nga Qendra Kryesore e Mjekësisë Familjare (QKMF) në Podujevë.
Në organizim morën pjesë nënkryetari i Komunës së Podujevës, Fahri Restelica, dhe drejtoresha e Shëndetësisë dhe Mirëqenies Sociale, Lirije Hoti-Rama.
Nënkryetari Restelica tha se aktivitetet e tilla janë të rëndësishme për shëndetin e qytetarëve dhe sensibilizimin e tyre për matjen e rregullt të sheqerit në gjak dhe kujdesin ndaj sëmundjes së diabetit.
Përmes aktiviteteve të tilla synohet rritja e vetëdijesimit të qytetarëve për diabetin, rëndësinë e kontrolleve të rregullta dhe diagnostikimin e hershëm të kësaj sëmundjeje.






