Kuvendi Komunal i Podujevës me shumicë votash sot miratoi buxhetin për vitin 2027 dhe parashikimet buxhetore për vitet 2028-2029.
Gjatë mbledhjes së rregullt të Kuvendit Komunal, drejtoresha për Buxhet dhe Financa, Arbnorë Uka-Osmani, e cila e paraqiti në pika të shkurtra këtë dokument, tha se projektbuxheti për vitin 2027 është në shumën prej 35,849,049.00 euro dhe atë nga granti qeveritar 33,365,709 euro, ndërsa nga të hyrat vetanake 2,483,340 euro.
“Prioritetet kryesore të Komunës së Podujevës për këtë periudhë janë zhvillimi i infrastrukturës në qytet dhe në fshatar, përmirësimi i arsimit dhe shërbimeve shëndetësore, rritja e mirëqenies sociale, mbështetja e kulturës, rinisë dhe sportit, zhvillimi ekonomik dhe përkrahja e bizneseve dhe bujqësisë, promovimi i turizmit dhe planifikimi i qëndrueshëm urban”, theksoi Uka-Osmani.
Pas një diskutimi të gjatë nga anëtarët e Kuvendit dhe përgjigjeve nga anëtarët e ekzekutivit, buxheti për vitin 2027 bashkë me parashikimet buxhetore për vitet 2028-2029 u miratua më shumicë votash.
Kryetari i Bulliqi i falënderoi anëtarët e Kuvendit të cilët me diskutimet e tyre dhanë një kontribut të rëndësishëm për projektbuxhetin.
“Ky është një projektbuxhet të cilin do ta kenë në dispozicion qytetarët e Komunës së Podujevës për vitin 2027 dhe unë besoj që kontributi i gjithsecilit prej juve, qoftë edhe sado i vogël është i mirë, sepse po mendohet që ky dokument të dalë sa më i mirë edhe të jetë sa më reprezentues për të gjithë qytetarët, por njëkohësisht edhe i zbatueshëm”, tha ai.
Gjatë kësaj mbledhjeje të rregullt të Kuvendit Komunal u miratua njëzëri edhe plotësim-ndryshimi i Statutit të Komunës.
Plotësim-ndryshimet i paraqiti kryesuesi i Kuvendit, Isak Shabani, ku ndër të tjera parashihet themelimi i një drejtorie të re, asaj për Investime Kapitale.
Pas votimit të kësaj pike, kryetari i Komunës, Shpejtim Bulliqi, i falënderoi anëtarët e Kuvendit për votën unanime që i dhanë plotësim-ndryshimit të Statutit.
“Po dua t’ju falënderoj për përkrahjen unanime këtij plotësim-ndryshimi të Statutit. Besoj shumë që kjo ka me qenë në interes të të gjithë qytetarëve. Shpresoj shumë që drejtorive të cilat kanë qenë të stërngarkuara me detyra dhe punë do t’iu lehtësohet pak puna”, theksoi Bulliqi.
Diskutime të gjata pati edhe në pikat “Informatë e Drejtorisë së Arsimit” dhe “Të ndryshme”, ku anëtarët e Kuvendit parashtruan pyetje për të cilat morën përgjigje nga drejtorët e Komunës.
Këto ishin të gjitha pikat e rendit të ditës që u shqyrtuan dhe u miratuan gjatë kësaj mbledhje:
- Deklarata “Jo në emrin tim”;
2. Procesverbali nga mbledhjet e Kuvendit të Komunës të mbajtura më:
– 30 korrik 2026 dhe 1 shtator 2026;
3. Propozim-Vendimi për miratimin e Projektbuxhetit të Komunës së Podujevës për vitin 2027 dhe parashikimet buxhetore për vitet 2028-2029;
4. Propozim i Draft-Statutit për plotësimin dhe ndryshimin e Statutit të Komunës së Podujevës nr.prot.01-020/01-0059862/18 të datës 29.06.2018
– Raporti nga konsultimi publik;
5. Propozim-Vendimi për formimin e komisionit ad-hoc për hartimin e draft-Planit të Punës Kuvendit të Komunës për vitin 2027;
6. Propozim-Vendimi për miratim paraprak për dhënien në shfrytëzim afatgjatë të pronës së paluajtshme të Komunës – Njësia kadastrale P-00425-1, Zona Kadastrale Zakut
– 5.1. Propozim-vendimi për formimin e komisionit për zbatimin e procedurave për dhënie në shfrytëzim;
7. Propozim-Vendimi për miratim paraprak për dhënien në shfrytëzim afatgjatë të pronës së paluajtshme të Komunës – Njësia kadastrale P-00429-0, Zona Kadastrale Zakut
– 6.1. Propozim-vendimi për formimin e komisionit për zbatimin e procedurave për dhënie në shfrytëzim;
8. Informatë e Drejtorisë së Arsimit – Përgatitjet për fillimin e vitit shkollor 2026/2027;
9. Rishqyrtimi i Vendimit të Kuvendit të Komunës nr.prot.01-016/01-0044927/26 i datës 30.07.2026 – (Shkresa e MAPL-së nr.020-521/4 e datës 04.09.2026);
10. Të ndryshme.
