Ministrja e Ekonomisë, znj. Artane Rizvanolli së bashku me nënkryetaren e Komunës, znj. Marigona Lahu, drejtorin e Arsimit, z. Avni Fetahu dhe përfaqësues të Fondit Kosovar për Efiçiencë të Energjisë, vizituan sot nga afër punimet që po zhvillohen në dy objekte shkollore në komunën tonë: shkollën fillore “Hamit Sejdiu” në Pakashticë dhe shkollën e mesme ekonomike “Isa Boletini” në Podujevë.
Këto ndërhyrje po realizohen në kuadër të investimeve që Fondi Kosovar për Efiçiencë të Energjisë, me mbështetjen e Ministrisë së Ekonomisë, është duke i bërë në katër objekte shkollore gjatë këtij viti, me një vlerë prej 742 mijë euro. Krahas këtyre dy shkollave, projekte të ngjashme janë duke u zbatuar edhe në shkollat fillore në Lladoc dhe Tërrnavë.
Vitin e kaluar, po nga ky fond, janë realizuar investime në katër objekte të tjera shkollore në vlerë prej 745 mijë eurove, duke e çuar totalin e investimeve në fushën e efiçiencës së energjisë në shkolla të komunës sonë në afër 1.5 milionë euro.
Investimet përfshijnë masa të rëndësishme për përmirësimin e kushteve të mësimit dhe rritjen e efiçiencës energjetike si: izolimi termik i objekteve, instalimi i sistemit të ngrohjes me kaldajë, ndërrimi i dritareve, ndriçimi LED dhe masa të tjera të domosdoshme për kursimin e energjisë.
Ministrja e Ekonomisë, znj. Rizvanolli, tha se:
“Ky investim është dëshmi e përkushtimit tonë për të krijuar kushte më të mira për mësim dhe për të mbrojtur mjedisin përmes rritjes së efiçiencës energjetike nëpër shkolla.”
Ndërsa Nënkryetarja znj. Lahu theksoi:
“Përmirësimi i infrastrukturës shkollore dhe krijimi i një ambienti të ngrohtë e të përshtatshëm për nxënësit është prioritet i yni dhe këto investime e kjo mbështetje nga ana e Qeverisë janë janë hapa konkret në këtë drejtim, për të cilën ne si institucione lokale jemi shumë falënderues”.
