Kryetari Veliu vizitoi zonat e përmbytura nga uji në fshatin Batllavë
Disa zona të komunës së Podujevës janë përfshirë nga vërshimet, si pasojë e shkrirjes së borës që ka ra më herët në sasi të madhe, e sidomos në zonat malore.
Zonat më të prekura nga vërshimet janë fshati Batllavë, Gërdoc, Bollopojë, Letanc etj,
Në masë të madhe ka ndikuar edhe derdhja e ujit të tepërt nga Liqeni i Batllavës i cili tash ka një sasi të madhe të ujit.
Kryetari i komunës së Podujevës z. Agim Veliu ka vizituar disa zona të përmbytura nga uji në fshatin Batllavë, ku banorët e goditur nga vërshimet i ka inkurajuar që nëpërmes të Brigadës të Shërbimit të Zjarrfikësve dhe Shpëtimit do të bëjmë çdo gjë që është e mundur për tu ardhur banorëve në ndihmë.
Kryetari i komunës z. Agim Veliu ka takuar stafin udhëheqës të tij për të biseduar rreth zgjidhjes së problemit të vërshimeve, e sidomos në fshatrat afër Liqenit të Batllavës. Ai tha se për të parandaluar vërshimet në fshatrat afër Liqenit që shkaktohen nga derdhja e tepërt e ujit të tij, duhet të zgjerohet shtrati i lumit prej Pendës e deri në Lluzhan, përkatësisht në lumin Llap ku bëhet derdhja e këtij uji.
Kryetari Veliu në kuadër të vizionit të tij për zgjidhjen e këtij problemi do të bëjë shumë shpejt kërkesë në instancat qeveritare dhe te dy kompanitë e mëdha publike në KEK dhe Ujësjellësin Rajonal Batllava-Prishtinë, të cilët janë pronar dhe shfrytëzues të këtij liqeni për të marrë përsipër financimin e një projekti të madh kapital për zgjerimin e shtratit të këtij lumi.
Po ashtu u kërkua nga Ujësjellësi Rajonal Batllava-Prishtinë të jenë më të kujdesshëm në menaxhimin e ujit, e posaçërisht në situata të tilla ku prurjet e ujit janë të mëdha.
Shërbimi i Zjarrfikësve dhe Shpëtimit që vepron në kuadër të Drejtorisë për Shërbime Publike, Mbrojtje dhe Shpëtim deri më tani ka intervenuar në shumë raste për ta larguar ujin prej bodrumeve të shtëpive të goditura nga vërshimet.
Faik Muçiqi, drejtor i Drejtorisë për Shërbime Publike, Mbrojtje dhe Shpëtim tha se
organet tona janë në gatishmëri të plotë dhe po punojnë me kapacitete maksimale e me një mobilizim të plotë për tu ardhur në ndihmë qytetarëve. Ne gjatë këtyre ditëve kemi intervenuar në Lagjen e Tovërlanëve, në rr.“Xhafer Meta”në Podujevë, në Gërdovc, Katunishtë, si dhe në raste tjera për ta larguar ujin prej bodrumeve të shtëpive, apo për të liruar rrugët e kalueshme nga uji. Edhe pse kapacitetet tona nuk po mund t’i përballojnë në të njëjtën kohë të gjitha rastet e prekura, mirëpo ne jemi duke e dhënë maksimumin për tu dalë në ndihmë qytetarëve tanë nga kjo fatkeqësi natyrore. Ne kërkojmë që në situata të tilla të ndihmojnë edhe vet qytetarët, për t’i evituar sa më shumë që të jetë e mundur dëmet materiale, tha mes tjerash Faik Muçiqi, drejtor i Drejtorisë për Shërbime Publike, Mbrojtje dhe Shpëtim.
Zyra për Informim e komunë së Podujevës
Podujevë, 19 shkurt 2010
Kryetari i komunës z. Agim Veliu ka takuar stafin udhëheqës të tij për të biseduar rreth zgjidhjes së problemit të vërshimeve, e sidomos në fshatrat afër Liqenit të Batllavës
