Në Sallën e Kuvendit të komunës së Podujevës u mbajt debati për fazën e dytë të prezantimit të Planit Zhvillimor Komunal, e udhëhequr nga mbikëqyrësi i projektit inxh. i dipl. Fatmir Uka i caktuar nga komuna e Podujevës. Në këtë debat ishte prezent kryetari i komunës së Podujevës z. Agim Veliu, zëvendëskryetari i Komunës dr Bahri Thaqi, kryesuesi i Kuvendit Hazir Raçi, drejtorë të drejtorive dhe përfaqësues të tjerë të udhëheqjes komunale, si dhe qytetarë të shumtë.
Prezantimi i fazës së dytë të këtij plani që është “Vizioni, Parimet dhe Caqet” u bë nga përfaqësuesit e kompanisë “Datagisconsulting” të cilët paraqitën detajet rreth këtij plani në fusha të ndryshme që kanë të bëjnë me zhvillimin e komunës së Podujevës.
Z. Veliu falënderoi kompaninë për këtë punë të çmueshme, duke iu thënë atyre se ne do ta shqyrtojmë me kujdes këtë draft të Planit Zhvillimor Komunal, për të parë se a duhet të ndryshohet diçka. Kryetari Veliu u shpreh se ky Plan duhet të jetë shumë afër realitetit në teren dhe rrethanave ekzistuese. Ky plan duhet po ashtu të jetë i lehtë për tu absorbuar.
Pas prezantimit të këtij plani, u hap debati, ku me vërejtjet e tyre kontribuuan grupet punuese dhe Këshilli i ekspertëve të emëruar nga komuna e Podujevës. Po ashtu debatit ju bashkëngjitën edhe qytetarë të cilët prezantonin në cilësinë e ekspertëve të fushave të ndryshme.
Përfaqësuesit e kompanisë shprehën gatishmërinë që nëpërmes të organeve përgjegjëse komunale të dërgojnë te ne vërejtjet me shkrim lidhur me këtë draft.
Në Sallën e Kuvendit të komunës së Podujevës u mbajt debati për fazën e dytë të prezantimit të Planit Zhvillimor Komunal,
