Me manifestime të shumta dhe të larmishme u festua Dita e Lirisë e komunës së Podujevës, e cila zgjati plot dy ditë. Shënimi i kësaj dite filloi me bërjen e homazheve tek varrezat e dëshmorëve, në përbërje të katër delegacioneve. Në delegacionin e parë të prirë nga zv/kryetari i komunës së Podujevës z. Bahri Thaçi, morën pjesë drejtorë të drejtorive dhe këshilltarë të Kuvendit të cilët vunë kurora lulesh të freskëta pranë varrit të Presidentit Historik të Kosovës dr. Ibrahim Rugova, pastaj homazhet vazhduan edhe nga grupet tjera tek varret e dëshmorëve të Llapit.
Ndërsa në Sallën e Kuvendit u mbajt një akademi solemne ku ishin të pranishëm
këshilltarë komunal, përfaqësues të FSK-së, SHPK-së, familjarë të dëshmorëve, udhëheqës të institucioneve lokale, përfaqësues të organizatave ndërkombëtare, OSBE, përfaqësues të KFOR-it etj.
Kjo akademi e udhëhequr nga kryesuesi i Kuvendit z. Hazir Raçi filloi me intonimin e Himnit Kombëtar. Më pastaj me një fjalë rasti iu drejtua të pranishmëve nënkryetari i komunës së Podujevës z. Bahri Thaçi, i cili fillimisht i transmetoi përshëndetjet më të sinqerta për këtë ditë nga ana e kryetarit të komunës së Podujevës z. Agim Veliu, i cili për momentin gjendet në një udhëtim të rëndësishëm zyrtar në shtetet e perëndimit. Z. Bahri Thaçi pasi përshëndeti të pranishmit tha:
“Kam nderin që me rastin e 11 vjetorit të marshimit të Aleancës më të madhe të vendeve të lira dhe demokratike për shpëtimin e një populli nga gjenocidi dhe shfarosja kolektive të ju përshëndes në emër të komunës së Podujevës. Shfrytëzoj rastin të ju them, se s’është nënçmim për kombin tonë të ju jemi mirënjohës përjetë Aleancës më të fuqishme të botës që t’i shprehim këtë falënderim.
Edhe kombet e mëdha ishin të robëruara 50 vjet më parë. Edhe ato ishin plot shpresë, se një ditë, dita e lirisë po afrohet. Për ato 6 qershori i vitit 1944 ishte një ditë e madhe kur këto kombe të robëruara pritën zbarkimin anglo-amerikan në Normandi që Europa sot e quan ditë të lirisë. Edhe kombi ynë priti plot 87 vjet që të zbarkohet aleanca më e fuqishme e botës për ta shpëtuar një popull të tërë. Rruga deri te kjo arritje ishte e gjatë dhe e vështirë. Falë vendosmërisë së Presidentit Rugova, urtësisë së tij politike që shtroi projektin madhor të zgjidhjes së çështjes sonë. Falë luftës së ushtrisë sonë çlirimtare, çështja e Kosovës shpejt doli nga margjinat e historisë dhe u bë prioritet për zgjidhjen urgjente politike dhe ushtarake nga SHBA-të dhe vendet e lira evropiane.
Kjo mrekulli ndodhi më 12 qershor 1999, kur trupat e Aleancës hynë në Kosovë. Që nga 12 qershori e deri më 19 qershor ishin netët më të gjata për trevën llapjane. Falë djemve tanë të lirisë që i koordinonin punët me aleatët u shpejtua ritmi i intervenimit për ta ndaluar shfarosjen e tërë trevës llapjane, masakrës më të madhe që mund të ndodhte në historinë e kombit tonë.
Të nderuar këshilltarë, të nderuar mysafirë, sot jemi të lirë, por kemi shumë sfida zhvillimi përpara. Falë votës së lirë ne jemi të instaluar si pushtet në mënyrë demokratike, ku i kemi shumë borxhe qytetarit llapjan.
Duhet t’i realizojmë të gjitha premtimet e programeve tona zhvillimore. Duhet të vëmë rend dhe prosperitet ekonomik në të gjitha sferat e jetës në ato mundësi buxhetore që i ka komuna jonë. Vetëm kështu përmbushen idealet e shumë brezave që nuk e përjetuan lirinë, luftëtarëve që ranë në betejë, intelektualëve që edukuan këtë brez.
Lavdi të gjithë të rënëve për liri që e gëzojmë ne sot!
Urime 19 Qershori Dita e Lirisë!”
Më pas një delegacion i prirë nga udhëheqja komunale e bënë përurimin e rrugës së asfaltuar Bajçinë-Letanc. Kurse për mysafirët e kësaj akademie u shtrua një koktej rasti.
Në vigjilje të kësaj feste komuna e Podujevës ka organizuar edhe manifestime të shumta kulturore dhe sportive. Këto ditë janë mbajtur garat sportive në futboll, hendboll dhe karate, të cilat përfunduan pikërisht sot kur po kremtohet kjo ditë e shënuar. Po ashtu në mesditë është mbajtur një Koncert muzikor për fëmijë në Sheshin e Qytetit, kurse në mbrëmjen e ditës së sotme do të mbahet Koncerti i madh festiv në ambientet e pishinës “Bill Klinton”.
U shënua në mënyrë madhështore 19 Qershori Dita e Lirisë e Podujevës
