Kryetari i Komunës, Shpejtim Bulliqi, bashkë me komandantë të Ushtrisë Çlirimtare të Kosovës nga Zona Operative e Llapit, drejtorë dhe asamblistë komunalë, përfaqësues të shoqatave të dala nga lufta, familjarë të dëshmorëve dhe qytetarë, kanë përkujtuar sot 27-vjetorin e Betejës së Kaçandollit.
Manifestimi përkujtimor është mbajtur në fshatin Kaçandoll, ku janë bërë homazhe dhe janë vendosur lule të freskëta pranë lapidarit të kësaj beteje, në nderim të 7 dëshmorëve të rënë më 15, 16 dhe 17 shtator të vitit 1998.
Në fjalën e tij para të pranishmëve, kryetari Bulliqi tha se Beteja e Kaçandollit është ndër faqet më të ndritura të historisë së luftës çlirimtare të popullit tonë:
“Sot përulemi me respekt të thellë para lavdisë së kësaj beteje, e cila shënoi një faqe të ndritur të historisë sonë më të re. Në këto male e këto troje, u dëshmua edhe një herë se populli ynë nuk u dorëzua kurrë, por përballë çdo pushtuesi zgjodhi rezistencën dhe lirinë.”
Ai kujtoi me nderim të thellë shtatë dëshmorët e rënë në këtë betejë:
Bekim Maliqi, Bekim Lushaku, Naim Zhegrova, Fadil Sejdiu, Habib Zeka, Islam Rekaliu dhe Selim Rekaliu, duke theksuar se ata nuk ranë vetëm për Kaçandollin, por për të gjithë Kosovën dhe për lirinë që sot e gëzojmë.
“Ky vend, i larë me gjakun e dëshmorëve, mbetet udhërrëfyes për ne që të mos harrojmë asnjëherë sakrificën, por edhe të punojmë çdo ditë për ta bërë realitet ëndrrën e tyre – një Kosovë të zhvilluar, të drejtë dhe të barabartë për të gjithë qytetarët,” – tha kryetari Bulliqi.
Manifestimi përkujtimor për Betejën e Kaçandollit u organizua nga Komuna e Podujevës në bashkëpunim me organizatat e dala nga lufta e UÇK-së.
