Kuvendi i Komunës së Podujevës ka mbajtur sot një mbledhje komemorative në nderim të jetës dhe veprës së anëtarit të deritashëm të Kuvendit të Komunës, Gazmend Islami, i cili vdiq më 15 gusht pas një sëmundje të rëndë.
Mbledhja nisi me një minutë heshtje. Kryesuesi i Kuvendit, Hilmi Hoxha, tha se Gazmend Islami do të kujtohet si një njeri i përkushtuar dhe i përgjegjshëm, i cili dha një kontribut të çmuar në Kuvendin Komunal.
“Me përvojën dhe angazhimin e tij, ai gjithmonë punoi për të mirën e qytetarëve, duke qenë i drejtë dhe i palodhshëm në mbrojtjen e interesave të komunës sonë”, tha Kryesuesi Hoxha.
Ndërkohë, Kryetari i Komunës, Shpejtim Bulliqi, theksoi se Gazmend Islami ishte njeri shumë i veçantë, ishte shumë i drejtpërdrejtë e shumë i vendosur në kauzat që ai besonte.
“Sot, duke e kujtuar Gazin ne e ndjejmë dhimbjen e humbjes së tij, por njëkohësisht jemi krenarë që e patëm në mesin tonë. Puna dhe vepra që la pas vetës do të mbetet udhërrëfyes për ne. Dashuria për vendin, përkushtimi ndaj kombit dhe ndershmëria në shërbim të interesit publik janë virtytet e tij që do të jetojnë gjithmonë mes nesh”, tha Kryetari Bulliqi.
Fjalë rasti mbajti edhe ish-Kryetari i Kuvendit të Kosovës, Glauk Konjufca. Ai e kujtoi Gazmend Islamin si mik, atdhetar dhe si bashkëpunëtor të mirë.
“Gazmendi ishte njeri i sinqertë dhe i përkushtuar, i cili çdoherë vendoste interesin e vendit para interesit personal. Si mik e si bashkëpunëtor, ai la pas shembullin e një njeriu që punoi për të ardhmen dhe për të mirën e përbashkët”, tha ndër të tjera Konjufca.
Në emër të familjes foli vëllai Avni Islami, i cili e falënderoi Kryesuesi e Kuvendit, Kryetarin e Komunës, ish-Kryetarin e Kuvendit të Kosovës Konjufca dhe të gjithë të pranishmit për respektin dhe nderimin që iu bë Gazmend Islamit në këtë mbledhje komemorative.
Në mbledhje të pranishëm ishin edhe familjarë të të ndjerit, anëtarë të Kuvendit e drejtorë të Ekzekutivit Komunal, deputetë e qytetarë.
