Takim për të drejtat e komunitetit ashkali në komunën e Podujevës
KMDLNJ, Zyra e Kryeministrit dhe Njësiti për mbrojtjen e të drejtave të njeriut në kuadër të komunës së Podujevës organizuan sot një debat me temën “Promovimi i të drejtave të minoriteteve në Kosovë”. Ky debat u mbajt në lokalet e Qendrës së Kulturës të komunës së Podujevës, ke merrnin pjesë zyrtarja e Zyrës së Kryeministrit për çështje të komuniteteve znj. Safete Grajçevci, zyrtarja për Barazi Gjinore e komunës së Podujevës znj. Naime Podvorica, publicistët Halil Matoshi dhe Shkëlzen Gashi, si dhe përfaqësues të komunitetit ashkali, të cilët përfaqësonin të drejtat e tyre në komunën e Podujevës nëpërmes të partive të tyre politike dhe OJQ-ve.
Znj. Grajçevci në emër të Zyrës së Kryeministrit për çështje të komuniteteve përshëndeti përfaqësuesit e komunitetit ashkali, duke i informuar ata se kjo Zyrë është e angazhuar të ndikoj në ndihma dhe këshilla për këtë komunitet. Ne bëjmë politika për mbrojtjen e të drejtave të komuniteteve pakicë, e në veçanti për komunitetin ashkali, tha mes tjerash znj. Grajçevci.
Ndërkaq znj. Podvorica në emër të komunës së Podujevës shprehu përkushtimin për ta ndihmuar komunitetin ashkali në fusha të ndryshme, gjithmonë dhe gjithherë aty ku lejojnë mundësitë financiare dhe në suaza të ligjeve në fuqi. “Ne e dimë se gjendja ekonomike e këtij komuniteti nuk është e kënaqshme, sikur që nuk është e kënaqshme edhe për komunitetin shumicë të komunës sonë, dhe kjo gjendje është përafërsisht e njëjtë në tërë Kosovën, por që ka indikacione se kjo gjendje është ndjeshëm duke u përmirësuar.
Publicisti Shkëlzen Gashi u shpreh se të drejtat e komunitetit ashkali në Kosovë nuk janë aspak të mira. Ai tha se Kushtetuta e Kosovës e hartuar në bazë të Planit të Ahtisarit i trajton të gjitha bashkësitë etnike si komunitete, dhe jo si minoritete, për të mundur më pastaj shumica të përkujdeset për minoritetet që jetojnë në shtetin e Kosovës. Kjo pra nuk garanton respektimin e të drejtave të minoriteteve.
Halil Matoshi po ashtu publicist u shpreh se idealet e një shoqërie demokratike nuk janë etnizimi, por deetnizimi, dhe Plani i Ahtisarit është një model i tillë i etnizimit. Z. Matoshi iu drejtua përfaqësuesve të këtij komuniteti se ata duhet të jenë pjesë aktive në jetën politike-shoqërore. “Te ngritja e juaj ndikon shumë edhe rritja e cilësisë së arsimimit, sepse përfaqësuesit e Juaj mirë të arsimuar do të jenë mbështetësit më të mirë për mbrojtjen e të drejtave Tuaja”, tha mes tjerash Matoshi.
Më pas u dëgjua zëri i disa prej përfaqësuesve të këtij komuniteti, të cilët kishin vërejtjet e tyre rreth të drejtave në lëmin e punësimit, në fushën sociale, por kishin edhe lëvdata për disa çështje që institucioni komunal i mbështetë ata. Në këtë debat kontribuoi Shaban Ahmeti, Agim Hyseni, përfaqësues të tyre nëpërmes të partive politike, përkatësisht OJQ-ve, si dhe pjesëtarë të tjerë të këtij komuniteti.
Ky projekt është i financuar nga Qeveria e Kosovës, Zyra e Kryeministrit dhe po implementohet nga KMDLNJ.
Postuar me datë:09-02-2010
KMDLNJ, Zyra e Kryeministrit dhe Njësiti për mbrojtjen e të drejtave të njeriut në kuadër të komunës së Podujevës organizuan sot një debat me temën “Promovimi i të drejtave të minoriteteve në Kosovë”.
