Sot në ambientin e shkollës fillore dhe të mesme të ultë “ Zenel Hajdini” në Lupç të Poshtëm u kremtua Dita e shkollës, ku merrnin pjesë nxënësit e kësaj shkolle, mësimdhënësit, prindërit, si dhe mysafirë të shumtë. Këtë manifestim me pjesëmarrje e nderuan ish – kryetarët e komunës së Podujevës këshilltari i presidentit Sejdu, Ilaz Pireva, këshilltari i zv/Kryeministrit Manaj, Agim Kikaj, si dhe përfaqësues komunal. Së pari fjalën e mori drejtori i kësaj shkolle, z. Rrahim Bajgora, i cili ndër të tjera tha:
“Prezenca juaj këtu, na ka nderuar pa masë, ka nderuar dhe vlerësuar punën dhe mundin e nxënësve e mësimdhënësve të shkollës tonë, që përditë e më shumë po realizojnë objektivat e dijes dhe kulturës”.
Ai vazhdoi më tej duke thënë: “Shkolla jonë veprimtarinë e ka filluar para luftës së dytë botërore (1919=1920). Nga kjo shkollë kanë dalë shumë kuadro të mirëfillta e që janë të njohura në shoqërinë dhe opinionin tonë, si shkrimtarë e patriot të studiues e fusha të ndryshme,veprimtar të paepur për rezistencën dhe luftën për liri. Sot punojmë në kushte dhe rrethana krejt ndryshe nga e kaluara, kemi arritur që të kemi një objekt që i plotëson kushtet dhe nevojat për një punë të mirëfilltë edukativo-arsimore, për çka falënderojmë institucionet tona dhe donatorët e ndryshëm që për ditë e më shumë po i japim formë dhe përmbajtje gjithë kësaj. E them me modesti që me punën që po zhvillohet për ditë e më shumë po arrijmë edhe rezultate konkrete në të gjitha fushat e dijes dhe aktivitetet e kulturës, si nga artet e sportet për çka më duhet që para jush të falënderoj arsimtarët e këtyre fushave posaçërisht ekipin e futbollit që këtë vit mori vendin e parë në nivel komune. Sot do të shfaqim një program të përgatitur nga nxënësit dhe mësimdhënësit e vyer të kësaj shkolle, për të festuar Ditën e shkollës tonë, së bashku me ju.
Na mbetet vetëm puna e madhe që duhet ta bëjmë për emancipimin, ndërtimin dhe zhvillimin e vendit tonë”, tha në fund të këtij fjalimi z. Bajgora.
Në fund të këtij manifestimi u dha një program i pasur kulturo-artistik dhe u shtrua një koktej rasti.
Shkolla “Zenel Hajdini” e fshatit Lupç i Poshtëm kremtoi Ditën e Shkollës
