Kryeshefi ekzekutiv i Kompanisë Rajonale të Mbeturinave (KRM) “Pastrimi”, Petrit Reçica, qenka munduar t’ia hedh fajin Komunës së Podujevës për dështimin e tij si kryeshef për të menaxhuar si duhet këtë Ndërmarrje.
Në ata pak rreshta në deklaratën e tij dhënë Gazetës “Insajderi’, ai paska thënë shumë të pavërteta rreth menaxhimit të mbeturinave në Komunën e Podujevës.
Po i përgjigjemi me rend:
Paska thënë se problemi është krijuar ndër vite duke e ndërlidhur me mosrishikimin e tarifave të shërbimit.
E para, problemi me mbledhjen e mbeturinave në Komunën e Podujevës është vetëm këtë vit dhe jo qe 4 vjet.
E dyta, Komuna e Podujevës ka qenë e gatshme ta procedojë në Kuvend edhe propozimin për tarifa të reja, por nuk ka asnjë logjikë që kjo të bëhet në kohën kur shërbimi i mbledhjes së mbeturinave është në nivelin më të keq të mundshëm.
Po të ishte problemi vetëm i tarifave, atëherë ky problem nuk do të ishte edhe në komunat tjera që operon KRM “Pastrimi”, madje gjendja kaotike është edhe në kryeqytet.
E treta, Komuna e Podujevës vetëm për 3 vjet e ka subvencionuar këtë Ndërmarrje me 100,640 euro (në vitin 2022 me 20,000 euro, 2023 me 20,640 dhe në vitin 2025 me 60,000 euro).
Në bashkëpunim me GIZ-in Komuna e ka ndihmuar dhe bashkëfinancuar KRM “Pastrimi” për regjistrimin e të gjitha ekonomive familjare, ndërsa detyrë e Petrit Reçicës si kryeshef ka qenë futja e tyre në sistem për të inkasuar pastaj të hyra. Mirëpo, as këtë nuk e ka bërë.
Po ashtu Komuna e Podujevës e ka ndihmuar KRM “Pastrimi” edhe me kamionë për bartjen e mbeturinave: në vitin 2022 ia ka dhënë në shfrytëzim 2 kamionë (donacion nga GIZ-i gjerman) dhe në vitin 2023 1 kamion (të dhuruar nga Komuna e Linzit pas marrëveshjes së binjakëzimit), por sot të gjithë i ka jashtë funksioni.
Është e pakuptimtë që Petrit Reçica me aq lehtësi thotë se shpallja e gjendjes emergjente në Podujevë është skenar për të inskenuar krizë. Duhet të jesh fort i papërgjegjshëm dhe shumë naiv të bësh deklarata të tilla, duke u përpjekur që dështimin t’ia bartësh të tjerëve, kur gjendja me mbeturina në Podujevë është kaotike dhe krejt kjo për fajin e KRM “Pastrimi” dhe atij si kryeshef.
Petrit Reçica në vend se të merret me deklarata të pavërteta, duhet të merret me menaxhimin e mbeturinave, për çka edhe paguhet, sepse me propagandë nuk zhduken mbeturinat.
Dhe në fund, ai duhet ta di aq punë që Komuna e Podujevës nuk mbledh e as bart mbeturina. Përgjegjësia për mosmbledhjen e mbeturinave, ose çdo vonese për të ofruar këtë shërbim bie mbi KRM “Pastrimi” e jo Drejtorisë së Shërbimeve Publike siç paska deklaruar ai.
Çdo përpjekje për ta zhvendosur fajin, dështon përballë këtij realiteti.
