Shtabi Emergjent për Mbrojtje dhe Shpëtim i Komunës së Podujevës shpalli gjendjen emergjente për shkak të situatës së rënduar nga mosbartja e mbeturinave nga operatorët përgjegjës. Ky vendim vlen nga data 05.08.2026 deri më 05.11.2026.
Kryetari i Komunës, Shpejtim Bulliqi, që është edhe kryesues i këtij Shtabi, tha se ka disa muaj që menaxhimi me mbeturina në qytet dhe fshatra të Podujevës është e rënduar.
Sipas tij, Kompania Rajonale e Mbeturinave “Pastrimi” për shkak të pamundësisë për të ofruar shërbime në pjesën e përgjegjësisë së saj, më herët ka kërkuar që të lirohet nga shërbimi në fshatra dhe kjo përgjegjësi ka kaluar të Kompania private “Natyra”.
“Por, tash po del që ka probleme për të ofruar këtë shërbim edhe në qytet. Ka raste që operon me një kamion, e ka ditë që nuk ofron shërbim fare. Për shkak të kësaj gjendje që është krijuar, ku tash i kemi edhe mërgimtarët këtu dhe vëllimi i mbeturinave është rritur dhe duke pasur parasysh shëndetin e qytetarëve e kam marr një rekomandim nga Drejtoria e Shërbimeve Publike që të shpallim gjendjen emergjente”, tha kryetari Bulliqi.
Ai theksoi se janë tri raporte që flasin për gjendjen e rënduar me mbeturina në Podujevë: raporti i Drejtorisë së Shërbimeve Publike, Mbrojtje dhe Shpëtim, Drejtorisë së Inspeksionit dhe raporti i QKMF-së.
Kryetari i Komunës deklaroi se Komuna e Podujevës në vazhdimësi e ka ndihmuar KRM “Pastrimi” edhe me subvencione, në mënyrë që t’ia lehtësojë operimin dhe funksionimin normal, por pa sukses.
“Vullneti jonë është që ta ndihmojmë këtë Ndërmarrje, por po shihet që ka keqmenaxhim nga menaxhmenti i kësaj Ndërmarrjeje në qendër. Për shkak të kësaj gjendjeje të rënduar, ne duhet të gjejmë një zgjidhje të shpejt për mbledhjen e mbeturinave në qytet”, tha ai.
Drejtori i Shërbimeve Publike, Mbrojtje dhe Shpëtim, Bahri Selimi, theksoi se për shkak të gjendjes së krijuar është vlerësuar se duhet të shpallet gjendja emergjente.
Rreth problemit me mbeturina foli edhe drejtori i Inspeksionit, Shuajb Blakçori dhe anëtarë tjerë të Shtabit, të cilët ranë dakord që të gjendet një zgjidhje e shpejt, për të dalë nga kjo situatë e rënduar.
Propozimi për shpalljen e gjendjes së jashtëzakonshme u miratua njëzëri.
Bazuar në vendimin e kryetarit të Komunës, Drejtoria e Shërbimeve Publike, Mbrojtje dhe Shpëtim obligohet të hartojë dhe zbatojë planin operacional emergjent për organizimin dhe koordinimin e të gjitha masave emergjente për grumbullimin, transportimin dhe largimin e mbeturinave si dhe inicimin e procedurës së përshpejtuar të prokurimit për sigurimin e 3 kamionëve me qira për bartjen e mbeturinave, duke përfshirë edhe 3 vozitës, të cilët do të operojnë në kuadër të KRM “Pastrimi”.
Drejtoria e Inspeksionit duhet të intensifikojë mbikëqyrjen inspektuese dhe të marrë veprime ligjore për parandalimin e deponive të paligjshme për mbrojtje të mjedisit, si dhe të ndërmarr masa administrative ndaj çdo shkelësi.
Drejtoria për Buxhet dhe Financa obligohet të sigurojë mjete financiare dhe të ndërmarrë veprime të nevojshme për financimin e masave emergjente në përputhje me legjislacionin në fuqi.
