Podujeva edhe këtë vit u bë pikëtakim i kulturave të ndryshme, duke mirëpritur Festivalin Ndërkombëtar “Newborn Kosova”, i cili për të tretin vit me radhë e ka nisur rrugëtimin e tij nga qyteti i Podujevës.
Në Sheshin “Katër Dëshmorët”, qytetarët patën mundësinë të shijojnë një mbrëmje të pasur me art, traditë dhe folklor, ku ansamblet nga Bullgaria, Holanda, Kosta Rika dhe Greqia sollën para publikut vallet tradicionale, muzikën autentike dhe veshjet karakteristike të vendeve që përfaqësojnë, duke krijuar një atmosferë festive dhe shumëngjyrëshe.
Në fjalën e tij, Kryetari i Komunës së Podujevës, Shpejtim Bulliqi, tha se është kënaqësi që Podujeva vazhdon të jetë nikoqire e një festivali me karakter ndërkombëtar, i cili promovon vlerat kulturore, miqësinë dhe bashkëpunimin mes popujve.
Ai theksoi se festivale të tilla e pasurojnë jetën kulturore të qytetit dhe i japin Podujevës një dimension ndërkombëtar, duke e shndërruar atë në një vendtakim të kulturave, traditave dhe vlerave artistike.
Gjatë mbrëmjes, FIDAF Kosova ndau një mirënjohje për Kryetarin, Shpejtim Bulliqi, në shenjë falënderimi për mbështetjen e vazhdueshme që Komuna e Podujevës i jep Festivalit “Newborn Kosova”.
Në shenjë respekti dhe mirënjohjeje për pjesëmarrjen dhe performancat e tyre, Kryetari Bulliqi u ndau mirënjohje ansambleve nga Bullgaria, Holanda, Kosta Rika dhe Greqia, duke i falënderuar për atmosferën e veçantë që sollën në Podujevë dhe për promovimin e kulturave të tyre përmes muzikës, vallëzimit dhe traditës.
