Kryetari i Komunës së Podujevës, Shpejtim Bulliqi dhe përfaqësuesja e Organizatës Ndërkombëtare për Migrim (IOM), Igballe Ymeri, kanë nënshkruar sot marrëveshjen e radhës në kuadër të Programit të BE-së për Stabilizimin e Komuniteteve (EU-CSP IV), e cila do të zbatohet nga IOM-i. Me këtë marrëveshje parashihet furnizimi me kabinet për drejtimin e makinerisë për IAAP “Fan S. Noli”.
Ky projekt do të mbështesë ngritjen e kapaciteteve arsimore dhe zhvillimin e aftësive profesionale për nxënësit. Vlera e tij është 12,964 euro, ku 10,000 euro financohen nga EU-CSP IV dhe 2,964 euro nga Komuna e Podujevës.
Kryetari Bulliqi falënderoi IOM-in për bashkëpunimin e vazhdueshëm, duke theksuar rëndësinë e investimeve në pajisje mësimore për shkollat profesionale, si bazë për aftësimin praktik të nxënësve.
Kjo është marrëveshja e shtatë me radhë mes Komunës dhe IOM-it vetëm në sferën e arsimit gjatë pesë vjetëve të fundit, gjë që dëshmon për një bashkëpunim të shkëlqyeshëm mes palëve.
