Nënkryetari i Komunës, Fahri Restelica, sot priti në takim ministren në detyrë të Ekonomisë, Artane Rizvanolli, me të cilën diskutuan për bashkëpunimin ndërmjet dy institucioneve për realizimin e projekteve në Komunën e Podujevës.
Pas këtij takimi, nënkryetari Restelica bashkë me ministren Rizvanolli, drejtorin e Shërbimeve Publike, Mbrojtje dhe Shpëtim, Bahri Selimi vizituan Fabrikën për përpunimin e ujit në fshatin Shajkoc, ku u takuan me kryeshefin ekzekutiv të KRU “Prishtina”, Arsim Fetahu.
Gjatë kësaj vizite ata u njoftuan për investimet që janë bërë në këtë Fabrikë dhe në rrjetin e ujësjellësit, ndërkohë që u dakorduan edhe për investime tjera të përbashkëta, të cilat do të ndikojnë në përmirësimin e furnizimit me ujë të pijes në Komunën e Podujevës.
Nënkryetari Restelica, ministrja Rizvanolli e drejtori Selimi vizituan edhe parkun solar në Shajkoc, ku u njoftuan nga afër rreth këtij investimi dhe për kapacitetet që do t’i ketë ky park solar në prodhimin e energjisë së ripërtëritshme.
