Kuvendi Komunal i Podujevës ka mbajtur mbledhje solemne me rastin e shënimit të 28-vjetorit të Epopesë së UÇK-së. Në këtë mbledhje u nderua sakrifica dhe qëndresa heroike e familjes Jashari në Prekaz, një nga ngjarjet më të rëndësishme në historinë e luftës për lirinë e Kosovës.
Mbledhja nisi me intonimin e himnit kombëtar dhe atij shtetëror, ndërsa të pranishmit mbajtën edhe një minutë heshtje në nderim të të gjithë dëshmorëve dhe martirëve që ranë për lirinë e vendit.
Kryesuesi i Kuvendit, Isak Shabani, tha se “Epopeja e UÇK-së nuk është vetëm një kapitull i historisë së luftës, por një pjesë e ndërgjegjes kombëtare. Në themelet e kësaj epopeje qëndron sakrifica sublime e familjes Jashari, në krye me komandantin legjendar Adem Jashari. Ka momente në historinë e një kombi që nuk maten me kohë, por me gjak. 5, 6 dhe 7 marsi janë pikërisht ato ditë”, theksoi ai.
Nënkryetari i Komunës, Fahri Restelica, u shpreh se Epopeja e UÇK-së përfaqëson një nga momentet më të fuqishme të historisë sonë kombëtare. Ai theksoi se qëndresa e familjes Jashari në Prekaz nuk ishte thjesht një betejë, por një akt vetëflijimi që u bë simbol i lirisë për gjithë shqiptarët.
Nënkryetari Restelica tha se Adem Jashari dhe familja e tij e ngritën sakrificën në një nivel që i dha kuptim të ri luftës për çlirim, duke dëshmuar se liria nuk është dhuratë, por fitore që kërkon përkushtim dhe sakrificë.
Dhe në fund nënkryetari shtoi se Prekazi mbetet një nga momentet kulmore të historisë sonë, një vend ku qëndresa dhe sakrifica u shndërruan në simbol të përhershëm të lirisë dhe dinjitetit kombëtar.
Me një fjalë rasti të pranishmëve iu drejtua edhe shefi i Zonës Operative të Llapit, Nuredin Ibishi, i cili theksoi rëndësinë historike të Epopesë së UÇK-së dhe sakrificës së dëshmorëve. Ai tha se rënia heroike e familjes Jashari dhe e të gjithë dëshmorëve të kombit mbetet themel i lirisë së Kosovës dhe kujtesë e përhershme për brezat që liria duhet ruajtur dhe forcuar çdo ditë.
Në mbledhjen solemne morën pjesë familjarë të dëshmorëve, përfaqësues të organizatave të dala nga lufta e UÇK-së, përfaqësues të institucioneve lokale, përfaqësues nga Bashkësia Islame në Podujevë, drejtorë të drejtorive komunale, si dhe media.
