Komuna e Podujevës ka vazhduar ciklin e dëgjimeve publike për hartimin e Projekt-Buxhetit për vitin 2027. Dëgjimi i dytë publik u mbajt në fshatin Lluzhan, me banorët e këtij fshati dhe të fshatrave përreth.
Dëgjimi publik u mbajt në shkollën “Afrimi e Fahriu”, ku morën pjesë nënkryetari i Komunës, Fahri Restelica, drejtoresha për Buxhet dhe Financa, Arbnorë Uka-Osmani, drejtori për Planifikim Urban dhe Mbrojtje të Mjedisit, Ahmet Ahmeti, zyrtarë komunalë, anëtarë të Kuvendit të Komunës dhe banorë të lokaliteteve përreth.
Takimin e hapi nënkryetari Fahri Restelica, i cili theksoi rëndësinë e pjesëmarrjes së qytetarëve në procesin e hartimit të buxhetit komunal. Ai u shpreh se dëgjimet publike janë mundësi e drejtpërdrejtë që qytetarët të paraqesin nevojat dhe prioritetet e komunitetit, ndërsa drejtoresha për Buxhet dhe Financa, Arbnorë Uka-Osmani, prezantoi të dhënat dhe planifikimet kryesore të Projekt-Buxhetit për vitin 2027, duke prezanatuar në pika të shkurta Qarkoren e Dytë Buxhetore.
Gjatë diskutimit, banorët pjesëmarrës parashtruan pyetje, kërkesa dhe propozime lidhur me nevojat e fshatit Lluzhan dhe lokaliteteve përreth. Kërkesat e tyre u fokusuan kryesisht në infrastrukturë, shërbime publike, arsim dhe bujqësi.
Kërkesat, propozimet dhe sugjerimet e paraqitura nga qytetarët u evidentuan në procesverbal dhe do të shqyrtohen nga grupi punues, me qëllim të mundësisë së përfshirjes së tyre në Projekt-Buxhetin për vitin 2027, në përputhje me prioritetet e përcaktuara dhe mundësitë buxhetore të Komunës.
