Kryetari i Komunës, Shpejtim Bulliqi, bashkë me Drejtorin për Shërbime Publike, Mbrojtje dhe Shpëtim, Bahri Selimi, vizituan Fabrikën e ujit në fshatin Shajkoc, ku u takuan me Kryeshefin ekzekutiv të KRU “Prishtina”, Arsim Fetahu dhe zyrtarë tjerë të ujësjellësit.
Gjatë kësaj vizite u trajtua çështja e reduktimeve të shpeshta të furnizimit me ujë të pijes në Komunën e Podujevës.
“Bashkë me Drejtorin e Shërbimeve Publike, Bahri Selimi, sot ishim në vizitë në Fabrikën e ujit në fshatin Shajkoc, për t’i shprehur shqetësimet e qytetarëve tanë rreth furnzimit me ujë të pijes. Nga Kryeshefi ekzekutiv i KRU ‘Prishtina’, Arsim Fetahu, dhe zyrtarët tjerë të ujësjellësit u njoftuam se reduktimet gjatë kësaj periudhe kanë ndodhur për shkak të turbullirave të mëdha dhe lajmi i mirë është se furnizimi me ujë të pijes pritet të përmirësohet deri në fund të javës”, theksoi Kryetari Bulliqi.
Edhe Kryeshefi ekzekutiv i KRU “Prishtina”, Arsim Fetahu, tha se për shkak të mbushjes së shpejtë të liqenit, kanë ndodhur turbullirat dhe, sipas tij, nuk ka qenë e mundshme të punojnë me kapacitete maksimale dhe për pasojë kanë ndodhur reduktimet me ujë të pijes. Fetahu theksoi se deri në fund të kësaj jave pritet të përmirësohet gjendja e furnizimit me ujë të pijes.
