Sot, në përkujtim të 26-vjetorit të masakrës ndaj familjeve Bogujevci, Llugaliu dhe Duriqi, Kryeministri Albin Kurti, Kryetari i Kuvendit Glauk Konjufca, Kryetari i Komunës Shpejtim Bulliqi, Nënkryetarja Saranda Bogujevci, si dhe drejtorë e asamblistë komunalë, bënë homazhe dhe vendosën lule të freskëta te varrezat e këtyre familjeve.
Më 28 mars 1999, forcat serbe kryen një nga krimet më të rënda të luftës në Podujevë, duke vrarë 16 anëtarë të këtyre familjeve, mes tyre gra, fëmijë dhe të moshuar. Kjo masakër mbetet një prej plagëve më të dhimbshme të historisë sonë, duke dëshmuar tragjedinë dhe sakrificën që populli i Kosovës përjetoi në rrugën drejt lirisë.
