Gjithandej arave të komunës së Podujevës po gumëzhijnë kombajnat për të mbledhur bereqetin e
bujqve llapjan të këtij viti.
bujqve llapjan të këtij viti.Fushata e korrje-shirjeve në komunën e Podujevës ka filluar më 11 korrik dhe po vazhdon tutje.
Kryetari i komunës së Podujevës z. Agim Veliu ka lëshuar një vendim me të cilin ka krijuar një Komision ose Shtab për mbikëqyrjen e procesit të korrje-shirjeve në komunën e Podujevës. Shtabin po e kryeson Vezir Jonuzi, të cilit po i vijnë në ndihmë Xhafer Sekiraqa, Rrahman Cakiçi, Eset Abdullahu, Jakup Shala, Latif Mehmeti dhe Milaim Ajvazi.
Drejtori i Drejtorisë për Bujqësi, Pylltari dhe Zhvillim Rural Vezir Jonuzi tha se këtë vit janë 5008 ha me drithëra të bardha të bujqve tanë për korrje-shirje. Në dispozicion janë 73 kombajna. Ndërsa kombajnerët po subvencionohen nga MBPZHR me diku rreth 300 l karburant. Jonuzi theksoi se këtë vit fatkeqësisht po dalin rendimente më të vogla në krahasim me vitin e kaluar, diku rreth 3000-3500 kg për hektar. Kjo ka ndodhur si pasojë e lagështisë së tepërt nga reshjet e mëdha të shiut në fazën më të ndjeshme të rritjes së kallirit të grurit.
Në një vizitë që z. Jonuzi e bëri në fshatin Llapashticë e Poshtme u takua me disa fermerë dhe kombajner, të cilëve u premtoi mbështetje, gjithmonë sipas mundësive buxhetore që ka komuna e Podujevës, përkatësisht Drejtoria për Bujqësi, Pylltari dhe Zhvillim Rural.Bujku Haki Latifi tha se po ndiej kënaqësi të veçantë për interesimin e drejtorit Jonuzi i cili na vizitoi në këto momente kur po bëjmë korrje-shirjen e arave tona. Po ashtu edhe kombajneri Fadil Hakiçi u shpreh falënderues për interesimin e përfaqësuesve komunal për ta parë më afër se si po shkon procesi i korrje-shirjeve. Megjithatë ata kërkuan që institucionet qendrore dhe lokale ti subvencionojnë edhe më shumë fermerët, sepse bujqësia është një sektor tepër i rëndësishëm që jap prodhime vendore dhe gjeneron vende të lira pune.
Fushata e korrje-shirjes në komunën e Podujevës po rrjedh me sukses
