Fëmijët në çerdhe dhe nxënësit nga parafillor deri në klasën e nëntë të Podujevës do të kenë ushqim të përgatitur nga Kuzhina Qendrore. Gurthemeli i këtij objekti është vënë sot në një ceremoni në të cilën ka marrë pjesë edhe Kryeministri në detyrë i Republikës së Kosovës, Albin Kurti e Kryetari i Komunës, Shpejtim Bulliqi.
Kryeminstri në detyrë Kurti e ka vlerësuar si lajm të rëndësishëm fillimin e ndërtimit të këtij objekti që pritet të përgatis ushqim për më shumë se 10 mijë fëmijë të Komunës së Podujevës.
“Ky është një lajm i mirë si për kujdesin e Komunës e të Qeverisë ndaj të drejtave dhe nevojave të fëmijëve, ashtu edhe për mbarëvajtjen e procesit mësimor, sepse të gjithë e dimë që mësimnxënia varet shumë nga mirëqenia e nxënësve. Bashkë me Kryetarin Bulliqi, sot vendosëm gurthemelin dhe falënderoj të gjithë ata që kontribuuan në përgatitjen e kësaj dite. Shumë shpejt do të vijmë ta përurojmë këtë kuzhinë të përfunduar. Urime të gjithëve”, u shpreh Albin Kurti.
Ndërsa, Kryetari i Komunës, Shpejtim Bulliqi, theksoi se ky është një hap i madh drejt përmirësimit të kushteve për fëmijët tanë dhe garanci që ushqimi i shëndetshëm dhe cilësor të jetë i qasshëm për çdo nxënës.
“Podujevën e kemi gjetur me një çerdhe publike dhe mandatin tonë do ta mbyllim me 9 të tilla, duke rritur kapacitetet infrastrukturore dhe duke përfshirë gjithnjë e më shumë fëmijë në arsimin parashkollor. Kuzhina Qendrore do të mundësojë ushqim të ngrohtë për fëmijët nga çerdhja deri në klasën e 9-të. Kësisoj, po bëjmë përgatitjet e para për të kaluar drejt mësimit gjithëditor. Shumë shpejt, Podujeva do të nisë këtë projekt të gjerë, duke krijuar kushte më të mira për të gjithë nxënësit tanë”, tha Kryetari Bulliqi.
Vlera e projektit është 700 mijë euro dhe ka një hapësirë prej 1,150 m², përfshirë restaurantin, dhoma përcjellëse, hapësira ndihmëse për punëtorët e administratës, etj.
