Festivali “Newborn Kosova” e ka hapur edicionin e katërt në qytetin e Podujevës. Pesë shtete si Kanada, Kili, Argjentina, Polonia dhe Bullgaria nëpërmjet asnambleve të tyre kanë performuar valle e këngë tradicionale të shteteve që përfaqësojnë.
Në hapjen e këtij Festivali që u mbajt në Sheshin “Katër Dëshmorët”, Kryetari i Komunës, Shpejtim Bulliqi, theksoi se Podujeva sonte është bërë një pikëtakim i kulturave të botës.
“Është kënaqësi dhe nder i veçantë për mua si Kryetar Komune që të hap zyrtarisht edicionin e katërt të Festivalit Ndërkombëtar ‘Newborn Kosova’, një ngjarje që rikthehet me madhështi në qytetin tonë dhe që e bën Llapin pjesë të hartës kulturore ndërkombëtare”, u shpreh Kryetari Bulliqi.
Ai tha se ky Festival nuk është vetëm një shfaqje vallëzimi apo një program artistik, por është një urë miqësie, respekti dhe bashkëjetese përmes artit.
Më pas ansamblet e këtyre pesë shteteve nëpërmjet këngëve e valleve tradicionale kanë shfaqur një kolorit të pasur kulturor e artistik për qytetarët e Podujevës.
Shfaqja ka nisur nga pasdita me defilimin e tyre në Bulevardin e Qytetit dhe ka përfunduar në mbrëmje me After Party-n që është mbajtur në Galerinë e Arteve, ku drejtoresha për Kulturë, Rini dhe Sport, Vlora Humolli-Jashanica, i ka nderuar ansamblet e shteteve pjesëmarrëse me nga një dhuratë simbolike dhe mirënjohje.
Ky Festival do të vazhdojë rrugëtimin e tij edhe në dy komuna tjera, por hapjen zyrtare për të dytin vit me radhë e ka bërë në Podujevë.
