Thirrjes së debatit me qytetarë nga ana e Kryetarit të komunës së Podujevës z. Agim Veliu për parandalimin e dukurisë së të shtënave me armë gjatë dasmave dhe ahengjeve familjare iu përgjigj një numër i madh i qytetarëve.
Ky debat u mbajt me moton “Festo me zemër, jo me armë”.
Debatin i cili u mbajt në sallën e Kuvendit të Komunës e hapi kryetari Veliu me ç’rast i falënderoi qytetarët për pjesëmarrje masive në këtë takim. Ai e përshëndeti u. d. të komandantit të Stacionit Policor të Podujevës Naim Latifin, zyrtaren e lartë të Ministrisë së Punëve të Brendshme Elisa Hoxha, përfaqësuesit e KFOR-it, OSBE-së, të Këshillit për Siguri në Bashkësi, përfaqësuesit e OJQ-ve, kryetarët e Komitetit të Fshatrave dhe të tjerët të cilët janë këtu që të kontribuojnë në parandalimin e kësaj dukurie.
Me këtë rast kryetari Veliu tha:
“Të nderuar qytetarë!
Këtë takim po e hapi me urime për fitoren më të re të Republikës së Kosovës dhe qytetarëve të saj në marrëdhëniet ndërkombëtare e që ndërlidhet me opinionin e GJND-së e cila ka vërtetuar se shpallja e pavarësisë ka qenë e ligjshme dhe plotësisht në pajtim me rregullat ndërkombëtare.
Mendimi pozitiv i GJND-së u hapë rrugë njohjeve të reja të Republikës së Kosovës si parakusht për anëtarësim në organizatat ndërkombëtare si dhe integrim të plotë në strukturat Euro atlantike.
Jo rastësisht e fillova me këtë urim nga se këtyre ditëve Kosova ka qenë në vëmendjen e gjithë botës.
Arritjet tona të deritashme janë të mëdha si rezultat i sakrificës dhe angazhimeve të vazhdueshme, por na duhet punë dhe angazhim i mëtejmë të dëshmojmë se jemi komb i qytetëruar, me kulturë perëndimore. Kjo është dëshmuar nga bashkatdhetarët tanë të cilët punojnë dhe jetojnë në Evropë, Amerikë e deri te Australia e largët, por gjithsesi me shumë veprime e kemi dëshmuar edhe ne që jetojmë këtu.
Në cilësinë e Kryetarit të Komunës jam vazhdimisht në dijeni për brengat dhe shqetësimet e qytetarëve dhe ju siguroj se jam i angazhuar maksimalisht në zgjidhjen e këtyre brengave në kuadër të kompetencave ligjore dhe mundësive buxhetore të Komunës.
Një prej brengave dhe shqetësimeve të të gjitha strukturave udhëheqëse të Komunës, Policisë së Kosovës dhe qytetarëve në përgjithësi është dukuria e të shtënave të pakontrolluara me armë zjarri të llojeve të ndryshme me rastin e dasmave dhe ahengjeve familjare.
Kjo dukuri më së paku përkon me traditat e shqiptarëve. Ne ende i kemi të freskëta pasojat e rënda nga armët e përdorura në kohën e luftës.
Në parim , të gjithë jemi kundër kësaj dukurie, por kjo po harrohet kur ka të bëjë me rastin e organizimit të ahengjeve familjare ku shpesh herë edhe ne gjendemi në atë mes pa i menduar pasojat e mundshme që jo rrallë herë edhe kanë pasur epilog tragjik.
Në këtë kontekst gjithsesi duhet menduar edhe për pasojat të cilat në rast se ndodhin nuk mund assesi të arsyetohen.
Qytetarë të nderuar !
Të gjithë jemi në dijeni se një dukuri e këtillë është plotësisht në kundërshtim me dispozitat ligjore . Po ashtu jemi në dijeni se ekzistojnë struktura përkatëse shtetërore dhe mekanizma të nevojshëm për evitimin e kësaj dukurie.
Strukturat përgjegjëse, duke u bazuar në rrethanat tejet të vështira të kaluara viteve të fundit, e kanë toleruar këtë dukuri me bindje se e gjithë kjo do të jetë e përkohshme dhe se qytetarët në një kohë do të vetëdijesohen dhe do të shmangen nga kjo dukuri. Por fatkeqësisht jemi dëshmitarë se realiteti është krejt tjetër.
Jemi plotësisht për respektimin e të drejtave të qytetarëve e në veçanti me rastin e organizimit të dasmave, gazmendeve dhe ahengjeve familjare, mirëpo mbi të gjitha jemi përgjegjës për sigurinë e jetës dhe pronës së qytetarëve, sepse ekzistojnë shumë mënyra të tjera të shprehjes së gëzimit pa e vënë asnjë jetë të çmuar të qytetarëve tanë në rrezik.
Ne jemi të obliguar të respektojmë sundimin e ligjit, andaj kërkoj nga të gjithë qytetarët që të heqin dorë nga përdorimi i armëve.
Kërkoj nga të gjitha subjektet politike, organizatat civile dhe OJQ, përfaqësuesit e fshatrave, udhëheqësit e komuniteteve, prijësit fetarë, Këshilli i Pajtimeve dhe individët me ndikim në përgjithësi dhe mediet në veçanti që ta japin kontributin e tyre në parandalimin e shfaqjes së kësaj dukurie të shëmtuar dhe primitive e me rrezik të lartë për jetën dhe sigurinë e qytetarëve.
Kërkoj nga organet përgjegjëse për zbatimin e ligjit, Policia dhe Gjykatat që të marrin të gjitha masat ligjore që kjo dukuri të ndalohet tërësisht. Ata të cilët bien ndesh me ligjin duhet të përballen me të dhe t’i vuajnë pasojat”.
Ndërkaq u. d. të komandantit të Stacionit Policor të Podujevës Naim Latifi i informoi pjesëmarrësit lidhur me aktivitetet e policisë në marrjen e masave kundër atyre që përdorin armët në dasmat dhe ahengjet familjare, si dhe atyre që përdorin armë pa leje. Ai përmendi disa raste kur fatkeqësisht ka pasur viktima dhe plagosje të dasmorëve. Kryesit e këtyre veprave jo ligjore me të identifikuar janë arrestuar dhe kanë filluar procedurat e mëtejme ligjore. Latifi tha se ne po ashtu po bëjmë aktivitete duke realizuar takime me qytetarë për ti vetëdijesuar ata që mos kryejnë veprime të tilla që bien ndesh me ligjin.
Më pas Kryetari Veliu e shpalli debatin të hapur ku qytetarë të ndryshëm kontribuuan me pyetjet e tyre, por edhe këshillat e tyre drejtuar qytetarëve.
Elisa Hoxha përfaqësuese e MPB kërkoi nga qytetarët që të ndikojnë në parandalimin e kësaj dukurie të rrezikshme. “Duke shtënë me armë gjatë këtyre ceremonive mund të ketë fqinjë që ende janë me zemër të thyer nga humbjet e më të dashurve të tyre në luftën e fundit në Kosovë”, tha ajo.
Ramush Jupolli tha se edhe Këshilli për Siguri në Bashkësi është duke kontribuuar shumë në parandalimin e kësaj dukurie.
Ramadan Mahmuti, fajtor janë edhe organet e gjyqësorit dhe policisë, kur dihet se ka raste që kriminelët lihen të lirë në shtëpitë e tyre, si dhe kur disa policë shtinë edhe vet me armë në ahengje të këtilla.
Nexhmi Balaj, drejtor i Drejtorisë për Kulturë, Rini dhe Sport, u shpreh se ndihem i mllefosur kur dëgjoj këto krisma të rrezikshme që e vrasin këngën, gëzimin, e prishin qetësinë për mësim dhe gjumë, por mbi të gjitha rrezikojnë jetë njerëzish. “Thuajse e vetmja gjë që na ka mbetur nga tradita është dasma, dhe atë fatkeqësisht jemi duke e shëmtuar nga të shtënat e panevojshme. Duhet ta dimë se ka shumë mënyra tjera për ta shprehur gëzimin, si kënga vallëzimi, qeshja etj.” nënvizoi Balaj.
Kadri Mehmeti u shpreh i shqetësuar për këtë dukuri, ku përpos që është e rrezikshme bënë edhe shpenzime të panevojshme që zbrazin xhepat e qytetarëve në këtë kohë me vështirësi ekonomike që po e përjeton Kosova.
Në fund Kryetari Veliu para përmbylljes të këtij debati u bëri edhe një herë apel qytetarëve që të vetëdijesohen dhe të heqin dorë nga përdorimi i armëve, si dhe kërkoi që organet e gjyqësorit dhe policia ti trajtojnë këto raste me efikasitet.
Debati qytetar me moton: “Festo me zemër, jo me armë“
