7.Marsi Dita e Mësuesit

Në Podujevë u shënua në mënyrë solemne 7 Marsi Dita e mësuesit

Me rastin e 7 Marsit Ditës së Mësuesit Drejtoria e Arsimit në bashkëpunim me Drejtorinë për Kulturë, Rini dhe Sport organizuan një manifestim në të cilin ishte i pranishëm kryetari i komunës së Podujevës z. Agim Veliu, drejtori i Drejtorisë për Arsim z. Nexhmi Rudari, veteranë të arsimit, mësues, arsimtarë dhe nxënës të dalluar.
Fillimisht fjalën e mori kryetari Veliu i cili mes tjerash tha: “Të nderuar zonja dhe zotërinj, sot kam privilegjin të ju dëshiroj mirëseardhje në këtë akademi solemne me rastin e 7 Marsit. 7 Marsi përveç nderimit dhe kujtimit të figurës madhështore të mësuesit prek ndjeshmërisht kujtimin për më të dashurit tanë që mbëltuan ndjenjën arsimdashëse dhe atdhetare në personalitetet tona. Atë ndjenjë dhe përgjegjësi që na bënë të punojmë me përkushtim institucional për përparimin e shkollës, ngritjen e cilësisë së arsimit për fëmijët tanë dhe ardhmërinë e vendit, prandaj nga këtu dua të ju uroj mësimdhënësve të komunës së Podujevës 7 Marsin Ditën e Mësuesit, meqë këtë vit mbushen 123 vjet nga themelimi i shkollës së parë shqipe.”, z. Veliu shtoi më tej, “Pjesëmarrës të nderuar fati i popullit shqiptar dhe i Kosovës ishte edhe fati i shkollës shqipe dhe i mësuesve të Kosovës”.
Më pas drejtori i DA-së z. Rudari përshëndeti të pranishmit dhe foli për historikun e shkollës shqipe. Ai mes tjerash tha: “7 MARSI është fitore madhështore, historike e  kombëtare, që nga mësimdhënësit kërkon përkushtim për mësimdhënie cilësore, nga nxënësit mësimnxënie pa kursim duke kryer detyrat e tyre të përditshme, nga komuniteti përfshirje aktive në të gjitha aspektet e shkollës duke përfshirë edhe procesin e vendimmarrjes sepse vetëm kështu përmbushim obligimin ndaj Atdheut mësuesve, shkollës  dhe të gjithë të tjerëve që u sakrifikuan për arsimin shqip”.
Organizatori për nder të kësaj dite mbajti një garë të recituesve, ku nxënës të shkollave të komunës së Podujevës recituan poezi të ndryshme, me ç’rast juria profesionale e përbërë nga Agron Gërguri, Mehmet Zeneli dhe Shqipe Sherifi shpallën tre recituesit më të mirë. Ku vendi i parë i takoi Blerinë Kodraliut, vendi i dytë i takoi Egzonë Krasniqit, ndërsa vendi i tretë i takoi Filloretë Rrahmanit.
Për nderë të kësaj dite Drejtoria për Arsim ndau mirënjohje për veteranët dhe mësimdhënësit më të dalluar të arsimit, të cilat i ndau z. Rudari. Ndërkaq në fund u dha një program i pasur kulturor-artistik e përgatitur nga Qendra e Kulturës e Podujevës.
Pas këtij manifestimi komuna e Podujevës në shenjë respekti kishte shtruar një koktej rasti për veteranët e arsimit dhe mësimdhënësit.

Zyra për Informim e komunës së Podujevës

05.03.2010

Me rastin e 7 Marsit Ditës së Mësuesit Drejtoria e Arsimit në bashkëpunim me Drejtorinë për Kulturë, Rini dhe Sport organizuan një manifestim në të cilin ishte i pranishëm kryetari i komunës së Podujevës z. Agim Veliu