Festivali i Poezisë “Valët e Llapit” i organizuar nga Shoqata e Shkrimtarëve të Llapit, këtë vit iu kushtua kujtimit për poetin, gazetarin e publicistin, Afrim Maliqi.
Ky organizim tashmë tradicional që u mbajt në Galerinë e Arteve në Podujevë, filloi me prezantimin e portofolios “Në kujtim të Afrim Maliqit” të përgatitur nga poeti Mexhid Havolli e regjisori Agron Gërguri.
Për jetën dhe veprën e Afrim Maliqit foli edhe nënkryetari i Komunës, Fahri Restelica.
“Ka njerëz që, edhe pa i njohur personalisht, arrijnë të të bëjnë për vete. Çdo personalitet me vlera, çdo karakter i veçantë që ecën në rrugët e këtij qyteti, të bie në sy dhe të lë mbresa. Nëse dikush do të më pyeste se cili është personaliteti që më ka lënë përshtypje që në fëmijërinë time, pa pasur kurrë rastin të ulem e të bisedoj me të, pa asnjë dyshim do të përmendja Afrim Maliqin”, u shpreh nënkryetari Restelica .
Në orën letrare të Festivalit me poezitë e tyre u paraqitën Sokol Qerimi, Xheneta Rekaliu, Ilmi Kadriu, Rudi Berisha, Abdullah Troshupa, Hamit Majkovci, Majlindë Deda e Safet Syla.
Çmimet për poezitë më të mira këtë vit iu takuan autorëve Safet Syla e Rudi Berishës.
Ndërsa, çmimi motivues “Afrim Maliqi iu dha poetes së re, Xheneta Rekaliut.
Organizimi i këtij Festivali është subvencionuar nga Komuna e Podujevës.
