Lidhur me lajmet e publikuara në disa portale rreth furnizimit me pelet Komuna e Podujevës sqaron si në vijim:
Komuna e Podujevës e ka pasur të nënshkruar një kontratë kornizë për furnizim me pelet për nevojat e shkollave, çerdheve, QKMF-në, zjarrfikësit. Por, operatori ekonomik me të cilin komuna ka pasur kontratë aktive nuk i ka përmbushur obligimet kontraktuale për furnizim, pavarësisht kërkesave të vazhdueshme.
Menaxheri i kontratës ka pranuar e-mail nga operatori ekonomik se nuk mundet ta vazhdojë furnizimin me pelet me arsyetimin se çmimi i këtij produkti është rritur në krahasim me kohën kur është nënshkruar kontrata.
Për shkak të mospërmbushjes së detyrimeve kontraktuale nga OE, Komuna ka marrë vendim për shkëputje të kontratës dhe i ka dërguar kërkesë kompanisë të sigurimeve që të njëjtit t’i konfiskohet sigurimi i ekzekutimit.
Meqenëse furnizimi me pelet është i domosdoshëm dhe urgjent për funksionimin e rregullt të institucioneve arsimore, veçanërisht të çerdheve publike, është zhvilluar procedura e prokurimit me negocim, me qëllim të sigurimit të furnizimeve të nevojshme dhe shmangies së pengesave në ofrimin e shërbimeve për fëmijët dhe institucionet arsimore.
Prioriteti i Komunës ka qenë dhe mbetet që asnjë institucion arsimor të mos përballet me vështirësi në funksionimin e përditshëm për shkak të mungesës së furnizimit me pelet.
Veprimet janë ndërmarrë duke pasur parasysh nevojat konkrete të shkollave dhe çerdheve, si dhe përgjegjësinë institucionale për të garantuar kushte sa më të mira për fëmijët dhe stafin arsimor.
