Sot, anëtarët Komitetit për Komunitete të kryesuar nga kryesuesi Xhafer Ademi, kanë vizituar shkollat ku vijojnë mësimin nxënësit nga komunitetet ashkali, rom dhe egjiptian.
Gjatë vizitave, anëtarët u njoftuan nga afër me mbarëvajtjen e procesit mësimor, përfshirjen e nxënësve në aktivitetet shkollore, si dhe me sfidat me të cilat ata përballen gjatë shkollimit. Në veçanti u diskutua për rëndësinë e vijueshmërisë së rregullt në mësim, parandalimin e braktisjes së shkollimit, krijimin e kushteve të barabarta për arsimim dhe ofrimin e mbështetjes së nevojshme për nxënësit e komuniteteve.
Vizitave iu bashkuan edhe nënkryetari i Komunës, Fahri Restelica, dhe udhëheqësi i Zyrës për Komunitete dhe Kthim, Liman Zeqiri. Fillimisht ata vizituan Shkollën e Mesme të Ulët “Ibrahim Rugova”, ndërsa më pas vizitat vazhduan në shkollat “Naim Frashëri” dhe “Shaban Shala”.
Nënkryetari Restelica ritheksoi përkushtimin e Komunës për të vazhduar mbështetjen e nxënësve nga komunitetet, duke krijuar kushte dhe mundësi të barabarta për arsimim dhe zhvillim. Ai theksoi se institucionet komunale do të vazhdojnë bashkëpunimin me shkollat, prindërit dhe përfaqësuesit e komuniteteve për adresimin e sfidave, rritjen e vijueshmërisë në mësim dhe përfshirjen sa më të plotë të nxënësve në procesin arsimor.
