Në kuadër të aktiviteteve të organizuara për “Ditët e Diasporës”, Kryetari i Komunës, Shpejtim Bulliqi, së bashku me Ministren e Industrisë, Ndërmarrësisë, Tregtisë dhe Inovacionit, Mimoza Kusari-Lila, kanë vizituar panairin e organizuar në bulevardin e qytetit.
Gjatë kësaj vizite, Kryetari Bulliqi dhe Ministrja Kusari-Lila panë nga afër produktet e ekspozuara, përfshirë punime artizanale, veshje dhe ushqime tradicionale, të përgatitura me përkushtim nga gratë pjesëmarrëse në panair.
Me këtë rast, Kryetari Bulliqi i përgëzoi gratë për punën dhe angazhimin e tyre, duke theksuar se iniciativa të tilla janë shembull i mirë i fuqizimit ekonomik dhe promovimit të vlerave kulturore. Ai shtoi se institucionet lokale, në bashkëpunim me nivelin qendror, do të vazhdojnë të mbështesin aktivitete që nxisin ndërmarrësinë dhe krijimin e mundësive për zhvillim.
Edhe Ministrja Kusari-Lila shprehu përkrahjen për pjesëmarrëset, duke inkurajuar vazhdimin e punës dhe zgjerimin e aktiviteteve të tyre, si një kontribut i rëndësishëm në zhvillimin ekonomik dhe social.
