Shtabi Emergjent për Mbrojtje dhe Shpëtim mbajti takim ku u diskutua çështja e zjarreve dhe nevojës për koordinim ndërinstitucional për të marrë masa për parandalimin e tyre.
Koordinatori i këtij Shtabi, Afrim Mulliqi, tha se ky takim është thirrur me qëllim që të koordinojnë veprimet dhe të marrin masat e nevojshme për parandalimin dhe menaxhimin e zjarreve, për shkak të temperaturave të larta që mbretërojnë në këtë kohë.
“Dua të theksoj se mbrojtja e jetës së qytetarëve, pronës publike e private, pyjeve dhe pasurive natyrore është përgjegjësi e përbashkët. Vetëm përmes bashkëpunimit të mirë mund të përballojmë me sukses çdo situatë emergjente”, theksoi ai.
Komandanti i Stacionit të Policisë në Podujevë, Bashkim Bajrami, kërkoi nga bujqit që të mos i djegin hamulloret, pasi në këto temperatura të larta ai tha se zjarri bëhet i pakontrolluar dhe pasojat mund të jenë të mëdha.
Ndërkohë, komandanti i Shërbimit të Zjarrfikësve dhe Shpëtimit, Milaim Ajvazi, shtroi nevojën për rritjen e kapaciteteve njerëzore dhe teknike të SHZSH-së dhe po ashtu themelimin e shoqatës së vullnetarëve të zjarrfikësve, në mënyrë që të mund të menaxhohen më mirë rastet e zjarreve.
Megjithatë, ai theksoi se krahasuar me vitin e kaluar këtë vit në muajin qershor dhe korrik ka pasur më pak raste të zjarreve.
Gjatë këtij takimi u tha se vitin e kaluar nga zjarret janë dëmtuar rreth 500ha pronë, kryesisht publike dhe se shumica e këtyre zjarreve janë shkaktuar nga faktori njeri.
Nga të gjithë të pranishmit u theksua nevoja për informim dhe sensibilizim të opinionit publik për shmangie të ndezjes së zjarreve në ambiente të hapura dhe gjithashtu për koordinim edhe më të mirë të të gjithë akterëve për parandalimin dhe menaxhimin sa më të mirë të rasteve të zjarreve.
