Këshilli Komunal për Siguri në Bashkësi (KKSB) i Komunës së Podujevës ka mbajtur mbledhjen e rregullt, në të cilën u analizua gjendja e përgjithshme e sigurisë në komunë.
Mbledhjen e hapi Kryetari i Komunës, Shpejtim Bulliqi. Gjatë takimit, komandanti i Stacionit Policor, Bashkim Bajrami, theksoi se situata e sigurisë në Podujevë vazhdon të jetë e qetë dhe stabile.
Sipas raportit të tij, gjatë periudhës 01.04.2026 – 15.05.2026 janë iniciuar gjithsej 169 raste, prej të cilave 119 janë vepra penale dhe 50 incidente apo aksidente. Janë evidentuar 9 raste të vjedhjeve, prej tyre 5 të cilësuara si vjedhje të rënda. Po ashtu, janë raportuar 16 raste të dhunës në familje dhe 4 incidente në shkolla.
Në këtë periudhë janë realizuar 24 urdhëresa të gjykatës. Sa i përket trafikut, është raportuar 1 aksident me fatalitet, 9 aksidente me të lënduar dhe 49 me dëme materiale. Gjithashtu, janë shqiptuar gjithsej 1112 tiketa trafiku.
Në aspektin e hetimeve, 75 raste janë dërguar në prokurori, ndërsa 37 raste janë ende nën hetime. Gjatë kësaj kohe janë konfiskuar 10 armë zjarri, 43 fishekë dhe 6 thika.
Në këtë mbledhje u miratua edhe Plani i punës së KKSB-së për vitin 2026, i cili u përkrah njëzëri nga anëtarët e Këshillit.
Kryetari Bulliqi njoftoi anëtarët se, për shkak të angazhimeve dhe aktiviteteve të tjera, jo gjithmonë mund të marrë pjesë në mbledhjet e këshillit. Për këtë arsye, ai propozoi që si koordinator i KKSB-së të emërohet drejtori i Shërbimeve Publike, Mbrojtje dhe Shpëtim, Bahri Selimi. Ky propozim u miratua njëzëri nga anëtarët.
Në pika të ndryshme të rendit të ditës u diskutuan edhe çështje që lidhen me mjedisin dhe shërbimet publike.
