Sot në Komunën e Podujevës u mbajt debati publik me qytetarë për Draft Programin Trevjeçar të Banimit 2026–2028, ku morën pjesë edhe nënkryetari i komunës, Fahri Restelica, si dhe drejtoresha për Shëndetësi dhe Mirëqenie Sociale, Lirie Hoti.
Hapjen e debatit e bëri drejtoresha Lirie Hoti, e cila foli për rëndësinë e hartimit të këtij draft programi për planifikimin e politikave të banimit në komunë. Ajo theksoi se ky dokument synon të krijojë politika më të qëndrueshme dhe gjithëpërfshirëse të banimit, duke adresuar nevojat e qytetarëve dhe veçanërisht të kategorive që kanë më shumë nevojë për mbështetje.
Pastaj, prezantimi i draftit u bë nga anëtaret e komisionit për hartimin e këtij programi, të cilët paraqitën qëllimin dhe vizionin e programit, përmbajtjen e tij, si dhe standardet evropiane mbi të cilat është bazuar hartimi i dokumentit. Gjatë prezantimit u fol edhe për sfidat që lidhen me planifikimin dhe zbatimin e politikave të banimit në nivel lokal.
Gjatë debatit, qytetarët e pranishëm ngritën pyetje dhe dhanë sugjerime lidhur me përmbajtjen e draftit.
Nënkryetari i komunës, Fahri Restelica, i falënderoi qytetarët për pjesëmarrjen dhe kontributin e tyre, duke theksuar se sugjerimet dhe kërkesat e paraqitura do të shqyrtohen me kujdes dhe do të ndihmojnë në pasurimin e draftit, në mënyrë që programi përfundimtar të reflektojë sa më mirë nevojat e qytetarëve.
Konsultimi publik për Draft Programin Trevjeçar të Banimit 2026–2028 mbetet i hapur deri më 24 mars. Qytetarët, organizatat dhe grupet e interesit mund të dërgojnë komentet, kërkesat dhe sugjerimet e tyre në emailin përkatës apo në drejtorin e shëndetësisë.
