Kuvendi i Komunës së Podujevës ka mbajtur sot mbledhje të jashtëzakonshme, e udhëhequr nga Kryesuesi i Kuvendit, Isak Shabani. Në mbledhje morën pjesë edhe Nënkryetari i Komunës, Fahri Restelica, drejtorë të drejtorive komunale, përfaqësues të KFOR-it si dhe përfaqësues të mediave.
Gjatë mbledhjes u shqyrtuan dhe u miratuan pikat e rendit të ditës:
1. Propozim-vendimi për përfaqësimin e Komunës së Podujevës në Kuvendin e Asociacionit të Komunave të Republikës së Kosovës
Përfaqësuesi i grupit të Lëvizjes Vetëvendosje, Haki Rudari, në përputhje me rregulloren në fuqi, prezantoi formulën e ndarjes së vendeve për përfaqësimin e Komunës së Podujevës në Asociacionin e Komunave të Republikës së Kosovës. Sipas këtij propozimi, përfaqësimi do të përbëhet nga: Kryetari i Komunës, Shpejtim Bulliqi, Kryesuesi i Kuvendit, Isak Shabani, dy përfaqësues nga radhët e LVV-së, Haki Rudari dhe Luljeta Muçolli, si dhe një përfaqësuese nga radhët e LDK-së, Gresa Maqastena. Propozimi u miratua nga anëtarët e Kuvendit.
2. Propozim-vendimi për themelimin e Këshillit Komunal për Siguri në Bashkësi (KKSB)
Kjo pikë u prezantua nga Nënkryetari i Komunës, Fahri Restelica, i cili dha sqarimet e nevojshme lidhur me funksionimin dhe rëndësinë e këtij këshilli, duke iu referuar edhe materialeve të shpërndara paraprakisht për anëtarët e Kuvendit. Me këtë rast, Nënkryetari Restelica uroi anëtarët e Kuvendit për marrjen e mandatit, duke theksuar rëndësinë e bashkëpunimit konstruktiv ndërmjet të gjitha subjekteve politike, me qëllim të avancimit të interesit të përgjithshëm publik dhe realizimit të projekteve në shërbim të qytetarëve të Komunës së Podujevës.
