Stadiumi “Zahir Pajaziti” pas gjashtë muajsh mund të mirëpres ndeshje të Ligës së Kampionëve dhe Ligës së Evropës, pas përfundimit të punimeve që filluan sot në ndërtimin e tribunave në anën lindore, mbulojave në krejt stadiumin dhe vendosjes së ndriçimit sipas kritereve të UEFA-s.
Me këto investime Stadiumi “Zahir Pajaziti” kalon nga kategoria e dytë në të tretën.
Në ceremoninë e vendosjes së gurthemelit mori pjesë Kryeministri në detyrë i Republikës së Kosovës, Albin Kurti, Kryetari i Komunës, Shpejtim Bulliqi, Ministri në detyrë për Kulturë, Rini dhe Sport, Hajrulla Çeku, deputetë, drejtorë e zyrtarë komunalë, zyrtarë të Klubit Futbollistik “Llapi” e qytetarë.
Kryeministri Kurti tha se ky investim në Stadiumin ‘Zahir Pajaziti’ do të jetë një shtysë më shumë për suksese edhe më të mëdha për Klubin “Llapi”.
“Klubi Futbollistik ‘Llapi’ ka një traditë të gjatë, është themeluar në vitin 1932, pra edhe pak bëhet 100 vjet dhe ne i kemi shumë borxh se prej këtu kanë dalë yjet tona të futbollit, e në historinë më të re që e mbajmë në mend edhe ne, duhet përmendur Fadil Vokrri dhe Favzi Rama. Prandaj, përveçqë e kemi obligim, besoj që është tejet e dobishme sepse investimi në sport e posaçërisht në futboll në këtë stadium në Podujevë, do të inkurajojë, do të shërbejë e do të ushqejë talente të reja në vitet në vijim”, theksoi Kurti.
Edhe Kryetari i Komunës, Shpejtim Bulliqi, u shpreh i lumtur për këto investime në Stadiumin “Zahir Pajaziti”, të cilat do të ofrojnë kushte më të mira për zhvillimin e ndeshjeve ndërkombëtare.
“Kënaqësi e veçantë që sot bashkë me Kryeminsitrin Kurti dhe Ministrin e Kulturës, Çeku jemi në inaugurimin e fillimit të punimeve të ndërtimit të pjesës lindore, një projekt i cili po finalizon të gjitha punët në këtë stadium, për arsye se tash do ta kemi edhe mbulimin në të gjitha pjesët e stadiumit, sipas standarde të UEFA-s që i plotëson të gjitha kriteret e stadiumit të kategorisë së tretë”, tha Kryetari Bulliqi.
Projekti për ndërtimin e tribunave lindore, mbulojave dhe ndriçimit kushton rreth 2 milionë euro dhe realizohet në bashkëpunim ndërmjet Komunës dhe Ministrisë së Kulturës, Rinisë dhe Sporteve.
Pas vendosjes së gurthemelit në këtë stadium, Kryeministri Kurti, Ministri Çeku e Kryetari Bulliqi ishin edhe te Pishina gjysmëolimpike dhe Qendra Multuifunksionale, për të parë nga afër realizimin e punimeve në këto dy projekte, që po ashtu burojnë nga marrëveshjet e bashkëpunimit ndërmjet Komunës e MKRS-së. Ata u shprehën të lumtur me dinamikën e punimeve në këto dy projekte të rëndësishme për kulturën, sportin e rininë llapjane.
