Kryetari i Komunës së Podujevës, Shpejtim Bulliqi, i shoqëruar nga drejtori i Arsimit, Avni Fetahu, mori pjesë sot në ceremonitë e vendosjes së gurthemeleve për dy projekte të rëndësishme në arsim.
Fillimisht, u vendos gurthemeli për ndërtimin e sallës së edukatës fizike në shkollën “Shaban Shala” në qytet, me sipërfaqe prej 650 m² dhe vlerë investimi 378,970.95 €. Kjo sallë do t’u mundësojë nxënësve zhvillimin e aktiviteteve sportive në kushte moderne dhe të sigurta gjatë gjithë vitit shkollor, duke përmbushur standardet për mësimin praktik dhe garat shkollore.
Më pas, u vendos gurthemeli për objektin e ri të shkollës “Jetullah Gashi” në Dobërdol, një investim në vlerë prej 664,995.24 €, me sipërfaqe 1,440 m². Objekti do të ketë nëntë klasa mësimore dhe një sallë për arsimtarë, duke ofruar hapësira bashkëkohore dhe kushte të përmirësuara për zhvillimin e procesit mësimor.
Shkolla e re në Dobërdol financohet nga buxheti komunal, ndërsa salla e edukatës fizike në “Shaban Shala” realizohet përmes bashkëfinancimit mes Komunës së Podujevës dhe Ministrisë së Arsimit, Shkencës, Teknologjisë dhe Inovacionit (MAShTI).
Në ceremonitë e sotme morën pjesë edhe drejtorë dhe zyrtarë komunalë, menaxhmenti dhe personeli i shkollave, si dhe anëtarë të Kuvendit Komunal.
