Kryetari i Komunës së Podujevës, Shpejtim Bulliqi, ka pritur sot në një takim familjen Tovërlani, e cila është bërë familja e parë strehuese në komunën tonë pas më shumë se 25 vjetësh. Ky hap i rëndësishëm është rezultat i avokimit dhe mbështetjes së Organizatës për Fëmijët pa Kujdes Prindëror – OFAP, si dhe bashkëpunim të Qendrës për Punë Sociale.
Gjatë takimit u diskutua për kushtet dhe kriteret që një familje duhet t’i plotësojë për t’u bërë familje strehuese, siç parashihet me Ligjin për Mbrojtjen e Fëmijës, ku çdo komunë obligohet të ketë familje të tilla. Procesi fillon në Qendrën për Punë Sociale, ku familja informohet për hapat dhe më pas aplikon për t’u licencuar nga Ministria e Drejtësisë për një periudhë pesëvjeçare. Familja Tovërlani tashmë ka përfunduar këtë procedurë dhe është e gatshme të kujdeset për fëmijën, megjithëse ende nuk ka marrë në kujdestari.
Në takim morën pjesë edhe drejtoresha e Shëndetësisë dhe Mirëqenies Sociale, Adelina Stublla, si dhe drejtoresha e Qendrës për Punë Sociale, Makfirete Zeka. Kryetari Bulliqi e përgëzoi familjen për vullnetin dhe gatishmërinë e tyre, duke i siguruar se Komuna e Podujevës do të jetë pranë tyre dhe do t’i mbështesë në çdo fazë të këtij procesi të rëndësishëm për mirëqenien e fëmijëve.
