Komiteti për Komunitete mbajti mbledhjen e radhës në të cilën u diskutua për fillimin e vitit të ri shkollor dhe përfshirjen e të gjithë nxënësve të komuniteteve joshumicë në procesin mësimor.
Kryesuesi i mbledhjes Xhafer Ademi theksoi se sipas informatave që ata kanë, të gjithë nxënësit e komuniteteve joshumicë që e kanë arritur moshën janë regjistruar në klasën e parë. Ai tha se sa i përket nxënësve në shkolla e mesme shumica janë regjistruar, por ka edhe të atillë që nuk janë regjistruar, pasi shkollimi i mesëm i lartë nuk është i detyrueshëm dhe mbetet në vullnetin e secilit nëse dëshirojnë të vazhdojnë shkollimin.
Për të pasur të dhëna të sakta rreth regjistrimit të nxënësve të komuniteteve joshumicë në shkollat fillore dhe ato të mesme, zyrtarja nga Drejtoria për Arsim, Minire Zhitia, kërkoi më shumë kohë për t’u kompletuar raporti, pasi tha se ende janë duke mbledhur informata nga terreni.
Ndërkohë, Kryesuesi Xhafer Ademi e pati një këkesë për institucionin e Komunës që, sipas praktikave të mëhershme, t’u sigurohen librat nxënësve të këtyre komuniteteve që i ndjekin mësimet në shkollat e mesme, por edhe të atyre të komunitetit shqiptar që nuk kanë mundësi t’i blejnë vetë.
Udhëheqësi i Zyrës për Komunitete dhe Kthim, Liman Zeqiri, tha se do të konsultohet me zyrtarët kompetentë të Komunës nëse do të mund të sigurojnë një fond që, sikur edhe më parë, nxënësve të shkollave të mesme nga komunitetet joshumicë dhe atyre të komunitetit shqiptar që nuk kanë mundësi t’i blejnë librat, t’u sigurohen nga komuna.
Sa i përket caktimit të datave për të realizuar vizita në shkollat në Sfeçël, Orllan dhe Batllavë, kryesuesi Xhafer Ademi tha se meqë është fillimi i vitit shkollor këto vizita të realizohen më vonë.
