Gazeta Insajderi, që më shumë i shkon emri “Outsajderi”, në një copë shkrim të ditës së sotme është munduar ta akuzojë Komunën e Podujevës kinse për anashkalimin e operatorëve ekonomikë me çmim më të lirë lidhur me “Hartimin e projektit për rregullimin e lumenjve”. Ky, kinse portal, në këtë shkrim që ia ka kushtuar më pak se 20 rreshta, nuk e ka kontaktuar asnjë nga palët e përfshira për të kuptuar të vërtetën rreth këtij tenderi, madje as operatorin ekonomik që është eliminuar, por është munduar vetë të nxjerr gjykime, jashtë çdo rregulli gazetar (siç ndodhë rëndom nga ky portal).
E sqarojmë për opinionin, se Operatori Ekonomik që kishte konkurruar me çmimin më të lirë është shpallur fitues nga Zyra e Prokurimit në Komunën e Podujevës, por ankesat e bëra në Organin Shqyrtues të Prokurimit nga operatori i tretë konkurrues ka bërë që OSHP-ja në vendimin e saj ta ndryshojë fituesin e kontratës për shkak se operatori me çmimin më të lirë është konsideruar i papërgjegjshëm, pasi i njëjti OE ishte në borxhe ndaj Administratës Tatimore të Kosovës.
Ndërsa, ankesa tjera nuk ka pasur nga OE-të që kishin konkurruar në këtë tender dhe Organi Shqyrtues i Prokurimit i rekomandon Komunës për të vazhduar tutje me Operatorin Ekonomik i cili edhe është shpallur fitues.
Por, Gazeta “Outsajderi” e anashkalon këtë fakt dhe mundohet të manipulojë me shifra, duke i “fshehur” pjesët kryesore të vendimit të Gjykatës së Tenderëve.
Komuna e Podujevës mbetet e përkushtuar që secila kontratë të përmbushet në tërësi dhe me cilësi sa më të lartë.
Më poshtë gjeni edhe vendimin e plotë nga Organi Shqyrtues i Prokurimit rreth kësaj lënde.
