Komuna e Podujevës ka mbajtur dje takimin publik me banorët e fshatit Kërpimeh dhe fshatrave përreth, në kuadër të procesit të hartimit të Planit Zhvillimor Komunal 2026–2034.
Në këtë takim morën pjesë drejtori i Urbanizmit, Liridon Gashi, drejtori për Buxhet dhe Financa, Fatlum Osmani, si dhe ekspertë të angazhuar për hartimin e këtij dokumenti të planifikimit hapësinor.
Gjatë diskutimit, qytetarët u njoftuan për rëndësinë e Planit Zhvillimor Komunal si bazë për zhvillimin e qëndrueshëm urban dhe rural të komunës në vitet e ardhshme. Përfaqësuesit komunalë dhe ekspertët prezantuan strukturën dhe përmbajtjen e dokumentit, fushat prioritare që do të trajtohen si dhe ndikimin që ky plan do të ketë në përmirësimin e infrastrukturës, shërbimeve publike, mbrojtjen e mjedisit dhe zhvillimin ekonomik lokal.
Banorët patën mundësi të japin komentet, vërejtjet dhe propozimet e tyre konkrete për nevojat që kanë komunitetet në zonën e tyre.
Ky është takimi i fundit i këtij cikli, ndërsa takime të tjera me qytetarë do të ketë pasi të hartohet drafti i Planit Zhvillimior Komunal.
